**سيبنى نايم يا جدى**

سبنى نـايم يا جدى !!!
زارنى جدى فى المنام .. شد ودانى وقالى إنت لسه بتنام؟!
قوم إتحرك قولى إيه الأخبار أوام؟
والله ياجدى الحال مبقاش يسر
من يوم ماسبت الدنيا وهى مدوقانا المر
زمان قلتلى يا جدى كل الكوسة دى فيها حديد
بس الكوسة دلوقت بتفتح البيبان الحديد
سبنى نايم ياجدى يعنى أصحى أعمل إيه؟!
أصحى أقعد على قهوه ولا أعاكس بنت الجيران ولا أجرب النت كافيه؟!
نفسى أكمل نص دينى بس مين ترضى بحالاتى؟
نفسى ألمس بنت حلوة بس تكون حلالى مراتى
مش بس أشوفها صورة فى تليفزيون
ولا نضرب ورقة عرفى زى أخويا المجنون
ولا أبيع مبادئى زى رضا العجلاتى..ساب تعليمه وداير مع البنات يوماتى
مانا مرضهاش لواحدة من بناتى
دا لو جبت بنات قصدى يعنى لو بقى ليا بيت وولاد
والله خايف يا جدى أجيب عيال يتبهد لو بعدى
أم عزة جارتنا دايخة على معاش عم حسين
أصله جالك من شهرين
وهى يا عينى من يوميها دايخة على كعوب الرجلين
منجدهاش ألا واسطة من خالتى أم شرين
شفت الكوسة يا جدى بتعمل إيه؟!
وعايزنى أصحى ..أصحى أعمل إيه؟!
أصحى أزرع فدان كوسه ولا قرع ولا باتونساليه؟!
سبنى نايم ياجدى نوم الظالم عباده
ما أنا لو صحيت أهرى وانكت فى نفسى زيادة
قولى إنت يا جدى إيه أخبار الى عندك
آه صحيح نسيت أقولك
عم يوسف إتقتل من يومين قتلوه إخواته الإتنين
بينهم ورث وأطيان وعمارتين
والله يا جدى الفقر نعمه برده
مستوره الحمدلله وأهى أيام وبيعدو
... جدى .. جدى ..إيه ماشى وسايبنى ليه؟!
تعبت من كلامى وحالنا الى مبقاش يسر
طيب أنام أنا بقى وأحلم مانا فى أحلامى حر